Загреб қаласы, Хорватия
KAZENERGY Бас директоры Әлібек Қуантыров Қазақстан тарапынан тең төрағасы Мағзұм Мырзағалиевтің атынан Қазақстан-Хорватия Іскерлік кеңесінің бірінші отырысына қатысты.
Қауымдастық басшысы өз сөзінде 2023 жылы өзара тауар айналымы 20%-ға артып, $432 млн. жеткенін атап өтті.
ҚР-дан экспорт – $398 млн
Хорватиядан импорт – $34 млн
Экспорттың 99,6%-ы Хорватияға Қазақстан мұнайы мен мұнай өнімдерін жеткізуді құрайды.
Сонымен қатар Іскерлік кеңес аясында Ә.Қуантыров еліміздің мұнай-газ саласындағы ҚР Үкіметінің маңызды әріптесі ретіндегі KAZENERGY қауымдастығы қызметінің негізгі міндеттері мен басты бағыттарымен таныстырды.
-Өзара тауар айналымын әртараптандырудың ықтимал бағыттары ретінде ауыл шаруашылығы, фармацевтика, туризм, білім беру, өнеркәсіп өндірісі және экономиканың басқа салаларындағы мүмкіндіктерді қарастыру ұсынылады, - деді ол.
Қазақстандық делегация құрамына KAZENERGY қауымдастығының мүшелері қатарынан мұнай-газ секторындағы бірнеше ірі компаниялар, сондай-ақ:
- ҚР Сыртқы сауда палатасы
- «Kazakh Invest» АҚ
- экономиканың әр түрлі салаларының жеке компаниялары кірді
KAZENERGY құрамына Қазақстанның мұнай-газ, энергетика және атом секторындағы 61 компания кіреді. Қауымдастық мүшелері мұнай және конденсат өндірудің 85%, газ өндірудің 95%, мұнай мен газ тасымалдаудың 100%, мұнайды қайта өңдеудің 95% және электр энергияны тасымалдаудың 100% қамтамасыз ете отырып, еліміздің энергетика саласына айтарлықтай үлес қосуда. Осылайша, Қауымдастық мұнай-газ саласындағы қызметтің барлық спектрін: геологиялық барлаудан бастап мұнай өнімдерін өндіруге, қайта өңдеуге, және сатуға дейін қамтиды.